Saodat Musayeva “Chirchiq tongi” gazetasida faoliyat yuritadi. Shuningdek, “Gulxan”ning eng faol jamoatchi mualliflaridan biri. Yaqinda Saodat opaning “Poytaxt exclusive”, “Arjumand media” nashriyotlarida birin-ketin uchta ajoyib, rangli, rasmlarga boy hikoya, ertak va she’rlari jamlangan kitoblari chop etildi. Ijodiy jamoamiz nomidan opani yangi kitoblari bilan tabriklaymiz. Ular sizning ham sevimli kitobingizga aylanishiga ishonamiz.

Quyida muallifning “Shifokor laylak”  to‘plamiga kirgan she’rlaridan namunalar o‘qiysiz.

Kimdan ne qolar?

Mohir bo‘lsa hunarmand,

Undan qolar yaxshi ot.

Olimlardan qolgusi

Olamshumul kashfiyot.

Shoirlardan nodir so‘z,

Bastakordan mumtoz kuy.

Me’mordan, quruvchidan

Uylar qolar cho‘zib bo‘y.

Yozuvchidan shoh asar,

Kimdan bog‘, ko‘cha qolar.

Haykaltarosh san’ati

Mangulikdan joy olar.

Elning e’tiborida,

E’zozida har ishi,

Halol mehnati ila

Shuhrat qozonsa kishi.

Tug‘ilgan joyim

Burgut qo‘msar qoyasin,

Baqa mamnun ko‘lidan.

To‘rg‘ay tanir uyasin,

Tuya kechmas cho‘lidan.

Har bir ungan giyohning

O‘z suygan tuprog‘i bor.

Adashgan chumoli ham

Uyasin izlaydi zor.

Tovushqonga tug‘ilgan

Tepasi bo‘lsa aziz,

Qushlar ham o‘zi qurgan

Oshyondan qolmas hargiz.

Ko‘nglimda yo‘qdir armon,

Seni sevganman doim.

Faxrlanib so‘ylayman,

Ey, men tug‘ilgan joyim!