Toshkent shahar Uchtepa tuma­nidagi 296-maktabning “Kitob­xonlik klubi” a’zolarining she’riy mashqlarini ijodiy-madaniy masalalar bo‘yicha tar­g‘ibotchi, O‘zbekiston Yozuvchilar uyushmasi a’zosi, shoir Ochil TOHIR taqdim etdi.

TILAK

Ijod yo‘lini tutdim

Niyatim ezgu.

Shoir Muhammad Yusuf

Men uchun ko‘zgu.

Taniqli  ustoz kabi

Xalqimni  suyib,

Ona yurtim taftini

Yurakdan tuyib

Nasib qilsa yozarman,

She’rlar-u doston

Chinakam shoir bo‘lish

Emasdir oson.

Tilagimga yetish-chun

Mehnat qilaman,

Kitoblarni o‘zimga

Ustoz bilaman.

Aziza YUSUPOVA,

 7-“A” sinf o‘quvchisi

VATANIM

Jannatmakon vatanim

Olamda tanho diyor.

Sen ulug‘,mangu shonim,

Yashayman men baxtiyor.

Sayr etganda bag‘ringni

Dildan yayrab ketaman.

Ulug‘lab men mehringni

Senga she‘rlar bitaman.

Jasmina NORMURODOVA,

 5-“V” sinf o‘quvchisi

QALBI QUYOSHIM

Mehri daryo  ustozim

Qalbi quyoshim.

So‘zi dono

Ustoz – sirdoshim.

Yurak faxrim o‘zingiz,

Jonga oro so‘zingiz,

Qadrlaymiz sizni biz,

Sizdan mamnun o‘g‘il-qiz.

Sizga havas qilaman,

Men ham  ustoz bo‘laman

Maktabim

Ta‘lim berar bizlarga,

Quvnoq o‘g‘il-qizlarga.

Nurli maskan maktabim,

Ilmga kon maktabim.

Maktabimiz sharafi,

A‘lochi o‘quvchilar.

Ortmoqda ular safi –

Ilmni uquvchilar.

Aziza ASADULLAYEVA,

 7-“A” sinf o‘quvchisi

KAPALAGIM

Chiroyli kapalagim

Gullar aro o‘ynaydi.

Go‘yoki kamaligim,

Ko‘rsam ko‘zim quvnaydi.

Iymona TOYIROVA,

5-“A” sinf o‘quvchisi