Men so‘z berdim o‘zimga,

Endi quloq solmayman.

Mayli, ukam ranjisin,

Tarafini olmayman.

Bo‘lsa noshud va anqov

Kaltak yesin, pand yesin —

Tushmayman men o‘rtaga,

Kim nima desa desin.

Yanglishdim bir-ikki gal

Uning yonini olib.

Endi sal ranj uchun ham

Meni izlar dod solib.

Mustaqil zarb berishga

Unda sira jur’at yo‘q,

 — Akamga aytaman! — der,

Qochayotib urar do‘q.

Orqasida borimni

His etmasa mabodo,

Botinmaydi mushukka

U “pisht” deyishga hatto.

Men so‘z berdim o‘zimga,

Endi quloq solmayman.

Mayli, ukam ranjisin,

Tarafini olmayman!

Rustam NAZAR