Nechogʻ baxtiyorman, taʼzimda shu tob,

Sizning shaʼningizga bitmoqdaman bayt.

Ne odam boʻlardim, qoʻlimda kitob

Biror harf tanimay tursaydim loqayd.

Siz-ku “Alifbo”dan “Qomus”gacha to

Bari-barisini tanitgan ustoz.

Ilk bor Siz koʻrsatgan duraxshon Zuhro,

Bu kun sheʼrim ichra tashbehdir mumtoz.

Siz moʻjaz yurakda yoqolgan yogʻdu,

Oqibat quyoshdek socha olar nur.

Buyuklar haqqiga qasamyod gap bu:

Sizdan boshlanadi asli tafakkur.

Olamda koʻp erur muborak onlar,

Tabarruk zotlar ham garchand koʻp erur.

Sizgadir ilk rahmat aziz insonlar,

Munis muallimlar, sizga tashakkur!

Abdulla Oripov