Vatan qadri

Chashma qoshida tiniq suv

Qadrini bilmas kishi,

Sayr etib gulshanda gulni

Ko‘ziga ilmas kishi.

Vah, bu ne g‘aflatki inson –

Ko‘ksida tutmish vatan,

Kim vatan ichra vatanning

Shukrini qilmas kishi.

Yurt nedir, yurt dog‘i nedir,

Yurtdan ayrilgan bilar,

Anglaguvchi yurt firoqin

Yurtda topilmas kishi.

Ey, vatandoshim, eshit

Bobur-u Furqat nolasin,

Besabab anduh tig‘ida

Bag‘rini tilmas kishi.

Bilma, farzandim, vatan hajrini,

Lek qadrini bil –

Kim vatan qadrini bilmas,

Angla, komilmas kishi.

Erkin Vohidov

 ***

O‘zingga bog‘liq

Mustaqillik ne demak,

Ne demakdir istiqlol?

Buni bilmog‘ing kerak,

Ma’nosini dilga sol.

O‘z yurting – yer, samosi.

Shahri gulshan ma’vosi.

Tongda esgan sabosi,

Tog‘i, bog‘i, daryosi

Endi o‘z mol-u mulking,

O‘z qo‘lingda o‘z erking.

Yurting nurga belanib

Ko‘ringaydir ko‘zingga,

Barcha oltin-gavharing

Buyursin-a o‘zingga.

Endi o‘zingga bog‘liq,

Ne ekib, ne o‘rmog‘ing.

Olqishlar seni borliq,

Zarur erur bilmog‘ing.

G‘ururing solib dilga,

Tezroq ulg‘ay, top kamol.

Erka farzandsan elga

Senikidir istiqbol.

Jumaniyoz Jabborov

 ***

Buyuk uyg‘onish

Yangi O‘zbekiston — buyuk Uyg‘onish,

Uchinchi Renessans tarixga kirdi.

To‘rt yil — to‘rt asrga tatigulik yil

O‘zbekiston dunyo tomon yuz burdi.

Sarhadlar ochildi. Ochildi yo‘llar,

Yanada yorqinroq porladi oftob.

Ona allalari hayotga qaytdi,

Sahro qumlariga singidi sarob.

Muzaffar o‘g‘lonlar, arslon o‘g‘lonlar

Zarbin tatib ko‘rdi bu dunyoi dun.

Bugun samodan nur mo‘l-ko‘l yog‘ilar,

O‘zbekiston uchun, o‘zbeklar uchun...

Sharifa Salimova

 ***

Yurtim kamoli

Shamol tegdi ko‘ksiga

Buyuk ona xalqimni.

Baxt keltirdi istiqlol,

Tanidi o‘z haqqini.

Adolatning timsoli,

Istiqlol – yurt kamoli.

Barcha udum, an’ana,

Qaytdi yana elimga.

Navro‘z qildi tantana,

Hurmat ortdi tilimga.

Humo qushi misoli,

Qo‘ndi boshga iqboli.

Elimning o‘z yo‘li bor,

O‘z fikri, o‘z maqsadi.

O‘ziniki topgani,

Yelga ketmas mehnati.

Hurlik – fikr, xayoli,

Kuldi elim iqboli.

Rauf Tolib

 ***

O‘zbek

Sig‘masa ham o‘zi, do‘stga

Joyi bor uning.

Yo‘lovchiga “Bir piyola

Choyi” bor uning.

Egatlardan topgan qaddi-

Yoyi bor uning.

Har yil yozda imorati,

Loyi bor uning.

O‘g‘il-qizi – yorug‘ yulduz,

Oyi bor uning.

O‘chmas izi, bosadigan

Toyi bor uning.

Do‘ppisini ko‘kka otib

Shodlansa arzir.

O‘zbekiston degan jannat

Joyi bor uning.

Dilshod Rajab

 ***

Mustaqillik to‘yi bu

Biz ozodmiz, biz hurmiz,

Boshimiz tik, mag‘rurmiz.

Biz erishgan marralar,

Bu go‘zal manzaralar,

Mustaqillik ne’mati,

Istiqlol sharofati.

Do‘stlarim, katta bayram,

Ko‘ngillar shod-u xurram.

Elim, yurtim to‘yi bu,

Yuksalishning bo‘yi bu.

Onamizdek parvona,

Eng aziz, eng yagona.

Bizning jon-u tanimiz,

Jannati Vatanimiz.

Yashnab borar kun sayin,

Shiddat bilan tinmayin.

Obod Vatan, obod yurt

Obod yarim ko‘ngillar.

Xalqim, qo‘lni qo‘lga ber,

Ajdodlar ruhi qo‘llar.

Zahro Hasanova

 ***

Istiqlolim

Ko‘zim ko‘rgan baxt, iqbolim,

Tilimdagi shakar-bolim.

Talpinganim chin a’molim,

Istiqlolim – istiqbolim.

Bobom-momom orzusisan,

Orzularning ezgusisan.

Qalb oynasi ko‘zgusisan,

Istiqlolim – istiqbolim.

Gullar taqdik chakkamizga,

Oftob tegdi yelkamizga.

Iymon qaytdi o‘lkamizga,

Istiqlolim – istiqbolim.

Sen madorim, sen qanotim,

Yoldor yo‘rg‘a – duldul otim.

Mazmunisan gulhayotim,

Istiqlolim – istiqbolim.

Ravshan Isoqov