Qoʻrquv

Ko‘p o‘ynadik ko‘chada,

Suv sepib, quvib.

Endi uyga kirolmay,

Turibmiz ivib.

Toʻngʻiz va fil

– Buncha burning uzun fil,

Ixcham emas mendayin?

– Buni xartum deydilar,

Gapirma-da, bilmayin.

Ishimiz koʻp

– Bo‘ldi, uxlang bolalar,

Chiroqqa ham bering dam.

– Dam oladi qachonki,

Dilshod olib kelsa sham.

Antiqa javob

– Ne sabab tush chog‘ida,

Hech uxlamaysan, Furqat?

– U vaqt muzlatkich bilan

Qizib ketadi “suhbat”.

Yarador dakang

– Bugun tongda qichqirmading,

Senga nima bo‘ldi, dakang?

– Eh, so‘rama, kecha jangda

Yaralanib kelgan akang.

Afsus

Mayna boqar uzumga:

– Juda yoqdi ko‘zimga.

Olay desam to‘ri bor,

Cho‘qib qochish ham dushvor.

Ishtaha

– Shuncha uzum qani Xol?

Qolibdi-ku shoxchasi.

 – Mayiz bo‘lib bozorga,

Yo‘l olishdi kechasi.

Doʻl yogʻganida

– Ko‘cha juda sovuqmi?

Men bilan yurgin Rashid.

– Tashqarida qor emas,

Yog‘ayapti marvarid.

Uzum

Bir tupda bir dunyoday

Inoqlikda o‘samiz.

Qushlar talab ketmasa,

Uzum bo‘lib pishamiz.

Tanishuv

Murabbo uchun sozman,

Ba’zi joylarda ozman.

Turim ko‘p – mayda, yirik,

Nomim bilsangiz – o‘rik.

Naima ANVAROVA,

O‘zbekiston Milliy universiteti talabasi