Ona

Farzandlarga bo‘lib parvona

Tunlar alla aytar:

– O‘sgin oppog‘im.

Onalik zavqiga qona va qona

Yupatar,

Erkalar umr chirog‘in.

Yig‘lasa g‘am chekar,

Shodlanar kulsa,

Diliga payvanddir har bir nafasi.

Bola tez ulg‘aysa,

Chin odam bo‘lsa –

Shudir onaizor orzu-havasi!

Shu niyat yo‘lida tunlari bedor,

Farzandi mehriga g‘arq bo‘lar ayol...

Bola o‘sgan sari sochga qo‘nar qor,

O‘zin keksayishin qilmaydi xayol.

Jumaniyoz Jabborov