Olimp tog‘larining toshiday mahkam

Sizdagi iroda, bardosh va sabot.

Kurash maydonida tengsizsiz, zotan,

(Kurash va sinovlar maydoni – hayot.)

Elim tarixiga boqsam bir nafas,

Oltin-kumushlarin ketishgan talab.

O‘kinch-u qayg‘udan nishon ham qolmas,

Bu kun nishon taqqan mardlarga qarab.

Medallar shaklida oltin-kumushni

Olib kelmoqdasiz yurtga qaytarib.

Hali ko‘p o‘zbekning olar ulushi,

Hali ko‘p mardlarga olqish – aytarim!

Siz butun insonsiz – bag‘ringiz butun,

Orzu-umidingiz sinmagan, sinmas!

Bayrog‘imiz baland – osmonga ustun,

Yurtim madhiyasi yangragay, tinmas!

Dilshod RAJAB