Assalomu alaykum! “Gulxan” jurnali saytiga xush kelibsiz!

Saytimizda bir-biridan qiziqarli maqolalar, hikoyalar, ertaklar va she’rlarni o‘qishingiz mumkin. Turli fanlarga oid ma’lumotlar bilimlaringizni yanada boyitishga yordam beradi!

“Parvoz zavqin tuyasan...”

Joʻjaxoʻrozning degani

Mening dadamdir xoʻroz,

U juda ham xushovoz.

Lekin biroz jahldor

Chunki masʼul ishi bor.

Borliqqa sochib jarang,

Qichqiradi erta tong.

Titratib togʻ-u toshni

Uygʻotadi quyoshni.

 

“Ushalmagan orzu”

Osmonlarda uchishni

Orzu qilgandi baliq.

Afsus uni “uchirgan”

Burgutga boʻldi oziq.

 

Tuyaqushga

Eh, azamat tuyaqush,

Yerda yurasan hanuz.

Nega qoqmaysan qanot,

Yoqmaydimi koinot?

Mitti boʻlsam ham qara,

Sayrgohim keng samo.

Bulutlar menga oʻrtoq,

Sen ham bir bor qanot qoq.

Parvoz zavqin tuyasan

Yugurishni qoʻyasan.

 

Maslahat

Garchi belimiz qilday,

Gʻayratimiz naq filday.

Yozda tinim bilmaymiz,

Qishda toʻyib uxlaymiz.

Doʻstim, qochma mehnatdan

Yashaysan farogʻatda.

 

Sheʼrlar muallifi

Muhabbat HAMIDOVA

2016–2020 © “Gulxan” jurnali tahririyati. Barcha huquqlar himoyalangan. Saytdan ma’lumot olinganda manba ko‘rsatilishi shart.