Zarvaraq kitoblar xilma-xil, lekin

Sen boshqa – ma’nosi, mag‘zi to‘kissan.

Sharhlaysan el, elat bo‘lish neligin,

Buyuk minbarlarda buyuk Qomussan.

Ko‘ngilga parvarish, jonga parvarish,

Millatman deganga yuz-u xotirsan.

Baxtiyor tug‘ilish, farovon yashash,

Qullik to‘nin yechib otgan botirsan.

Vatan ilm-u ziyo birla ulug‘dir,

Dunyoning izzati xosdir ilmga.

Ozodlik ona til birla to‘lig‘dir,

Bitiklarda mavqe berding tilimga.

Obro‘sin asrash-chun O‘zbekistonning,

O‘zbekning o‘zbekday yashashi uchun.

Tug‘ildim. Yashayman, degan insonning

Safda erkin qadam tashlashi uchun.

Borliging qanday xush, bag‘ri oftobim,

Har satring qo‘rg‘onli haq-haddim mening.

Kel, ko‘ksimga bosay, Qomus kitobim,

Sen borsanki, doim tik qaddim mening.

Kitob deganining xili ko‘p, lekin

Sen boshqa – ma’nosi, mag‘zi to‘kissan.

Sharhlaysan mustaqil VATAN neligin,

Buyuk minbarlarda buyuk QOMUSSAN.

Zamira FAYZIYEVA