Bugun o‘zining  qutlug‘ 60 yoshini ni­sho­nlayotgan taniqli  shoir  Muhiddin Omonning   “Sohir so‘zlar sandliqchasi” deb atalgan  kitobini o‘ziga xos so‘zlar xazinasi – Sizlarning ilk izohli lug‘atchangiz  desak  xato qilmagan  bo‘lamiz.  Negaki, kitobdan o‘rin olgan she’rlar vositasida siz bebaho ona tilimizdagi ko‘plab so‘zlarning ma’no va mazmunini  anglab olasiz.

Quyida  sizni  so‘zlarning sehrli olamiga sayr qildiruvchi  mazkur kitobdan  o‘rin olgan   ayrim she’rlar bilan tanishtiramiz.

Favvora

Favvorajon, favvora,

Zilol suvning konisan.

Jazirama issiqda,

Tanamning darmonisan.

Sensan shahar, bog‘larning

Husnu ko‘rkiga sayqal,

Buyuk ajdodlarim ham

Bilganlar ming yil avval.

Deydilar Temur bobom,

Dam olay, deb gohida...

Favvoralar qurdirgan,

Oqsaroyning toqida.

Sen esa suyuk hanuz,

O‘zgarsang-da, o‘shasan,

Hatto kuy chalib maxsus,

Rangli raqsga tushasan...

 Shul  sababdan e’zozlab,

 Parvonamiz biz har dam.

 Hatto senga bag‘ishlab

 O‘tkazamiz Bayram ham!

***

Inshoot

Inshoot ham asli bino,

Biroq katta,  muhtasham.

Inshoot deb atalgaydir

Zavod – fabrikalar ham.

Inshootdir, Suzish havza,

Hamda  Sport saroyi,

Inshootlar ko‘payganda,

Oshar yurtning chiroyi...

***

Ijod

Tilimizda Ijod degan

Xo‘p ajoyib  so‘z bordir.

O‘ylab ko‘rsak har bir bola -

Aslida ijodkordir.

Ijodkordir agar do‘sting

Bog‘chada solsa surat.

Yoki jo‘shib raqsga tushsa,

Bu ham shundan  dalolat...

Ijod qilish, iste’dod ham

Istak orzu ro‘yobi,

Jo‘shqin  ijod  mahsulidir,

Shoirning har   kitobi....

Muhiddin OMON