Karantinga rioya qiling!

Salomatlik tuman boylikdir,

Sog‘lom odam xo‘p chiroylikdir.

Kerak qat’iy tartib, intizom,

Sog‘lig‘ingiz himoya qiling,

Karantinga rioya qiling!

Toza bo‘lsin yuz-u qo‘lingiz,

Toza bo‘lsin niyat, dilingiz,

Oydin bo‘lar shunda yo‘lingiz,

Sog‘lig‘ingiz himoya qiling,

Karantinga rioya qiling!

Kurash bilan tirikdir inson,

Hayot o‘zi sinov-imtihon.

Kerak qat’iy tartib-intizom,

Sog‘lig‘ingiz himoya qiling,

Karantinga rioya qiling!

Mashaqqatning rohati bo‘lar,

Quvonchning vaqt-soati bo‘lar,

Po‘lat og‘a baxtingiz tilar,

Sog‘lig‘ingiz himoya qiling,

Karantinga rioya qiling!

Madhiyam

Serquyosh diyorimning

Serjilo jarangisan.

Har tong kulgan oftobday

Ohorlisan, yangisan.

Yaxshilikka boshlovchi

Hayotning zo‘r bongisan.

Qalbga qanot madhiyam,

Erkin hayot tongisan.

Jannat bog‘i, baland tog‘lar

Jilvalanar ko‘zimda.

Ulug‘ xalqim qudrati

Jo‘sh urar har so‘zingda.

Faxr-g‘urur mavjlanar

To‘lqin urib ko‘ksimda.

Toshqin daryo madhiyam,

Yorqin navo madhiyam.

Bolalik

Bolaligim – boychechak,

Bahorlarni boshlagan.

Ko‘ylagi kabi oppoq

Nahorlarni boshlagan.

Qum ko‘chalarda changga

Ko‘milgan bolaligim.

Ariqlarda baliqday

Cho‘milgan bolaligim.

Yozning o‘t quyoshida

Po‘lat bo‘lib toblangan.

Xivich toychoqni minib,

Kelajakka otlangan.

Bolga to‘lgan bog‘lardan

Quvvat olib bilagi,

Boychechakday boylangan

Ona yerga yuragi.

Poʻlat Xudoyberganov