Assalomu alaykum! “Gulxan” jurnali saytiga xush kelibsiz!

Saytimizda bir-biridan qiziqarli maqolalar, hikoyalar, ertaklar va she’rlarni o‘qishingiz mumkin. Turli fanlarga oid ma’lumotlar bilimlaringizni yanada boyitishga yordam beradi!

“Sizga mehrim boʻlakcha...”

Bayroq

Oʻn ikkita yulduzi,

Yarim oyi mujassam.

Undagi bor ranglarda,

Ulkan maʼno boʻlgan jam.

 

Qizil rang tomirimda,

Oqayotgan qonimdir.

Yurt bayrogʻi gʻururim,

Iftixorim, shonimdir.

 

Moviy rang osmonimdir,

Yashil qir-u dalalar.

Oq bu poklik ramzidir,

Esda tuting, bolalar!

 

Qulupnay

Ayni mavsum bogʻlarda,

Hil-hil boʻlib pishaman.

Gohida qolib dogʻda,

Qozonchaga tushaman.

 

“Nima uchun?” deysizmi,

Qiladilar murabbo!

Oʻz holimcha qishgacha,

Saqlash juda muammo.

 

Alvon rangli qiyofam,

Goʻyo mitti yurakcha.

Balki shuning uchun ham,

Sizga mehrim boʻlakcha.

 

Svetofor

Serqatnov koʻchalarda

Turgum yoʻlni koʻrsatib,

Qolmas hech kim xatarda,

Shahar boʻlmas betartib.

 

Yashil, qizil, sariq rang,

Bunda qonun mujassam.

Qoidani buzmasang,

Yoʻlovchisan chinakam.

 

Qizil chiroq yonganda,

Zinhor yurma, toʻxtab tur!

Yashil rang lip etganda,

Yoʻl seniki, tezda yur!

 

Mana koʻrding bolajon,

Men tinchingni oʻylayman.

Boʻlgin deya sogʻ-omon,

Bir zum tinim bilmayman.

 

Tipratikanning soʻzi

Onam, yumshogʻim, deydi,

Garchi toʻnim nish, tikan.

Yirtqichlar soya solsa,

Qalqonman nayzam bilan.

 

Nishli doʻppi kiyvolib,

Berkitgum koʻz-qoshimni.

Toʻp misoli tepvorib,

Ogʻritmangiz boshimni.

 

Insonlarga xavfim yoʻq,

Maskanimdir bogʻ-chaman.

Nayza denglar, mayli oʻq,

Shu tuproqni quchaman.

 

Zumrad Masharipova,

Zulfiya nomidagi davlat mukofoti sohibasi

2016–2020 © “Gulxan” jurnali tahririyati. Barcha huquqlar himoyalangan. Saytdan ma’lumot olinganda manba ko‘rsatilishi shart.