Har kungidek esib shamol,

Har kungidek tong otar.

Oyog‘iga kelmay mador –

Hali cho‘pon chol yotar.

Sergak otlar

Hayron o‘tlar –

Qirni qirov bosgan, nam.

Butkul esdan chiqib ketar

Derazada yongan sham.

Bugun behol sezar o‘zin –

U o‘ziga yengilar.

Yoshlanadi ikki ko‘zi,

Qolmadi u tengilar.

Chol otarga qarar bot-bot,

Ko‘ngli sezib xatarni.

Qayga sudrab borar hayot –

Jilovi yo‘q otlarni.

Xosiyat RUSTAMOVA