Osmonlarning bag‘ridan kulib,

Jilmayganda tanti quyoshim.

To‘lin oyni hovuchlarida

Tutayotir o‘n olti yoshim.

Otilarkan, kaftlari muzdek

Yillar, kunlar manglayim sari.

Uchib borar parcha yulduzdek

Toza ruhning kabutarlari.

Uchib borar yillarim ma’yus,

Yashash asli bir dalli savdo?!

Subhi sodiq kelib yuzma-yuz,

Shabnamlarga so‘ylarkan vido.

Qaydan keldi sochi qo‘ng‘iroq,

Qaroqlari xo‘p tortinchoq qiz?!

Yonginamda yoqqancha chiroq,

Simyog‘ochlar cho‘kayotir tiz.

Jilmaygancha zamin qa’rida,

Ma’volanar qismat – yo‘ldoshim.

To‘lin oyni hovuchlarida

Tutayotir o‘n olti yoshim.

Hulkaroy SATTOROVA,

Qashqadaryo viloyati

Ko‘kdala tumani 6-maktab 9-sinf