Tilay g‘ayrat senga, yosh shoir ukam,

Fazl-u hikmat senga, yosh shoir ukam.

Biz ham kuylab o‘tdik imkonlar qadar,

Endi navbat senga, yosh shoir ukam.

Mustaqil hur ma’vo seningdir, sening,

Ozod, emin sado seningdir, sening.

Biz shivirlab aytgan tuyg‘uni endi

Kuylash oshkoro seningdir, sening.

Nafosat yurtiga posbon bo‘l, o‘g‘lon,

Tili shamshir, ko‘ksi qalqon bo‘l, o‘g‘lon.

Avvalo shoir bo‘l, undan ham avval

Shu yurtga o‘g‘lon bo‘l, o‘g‘lon bo‘l, o‘g‘lon.

Erkin Vohidov,

Oʻzbekiston xalq shoiri