Qaltis o‘yin

Ko‘kda qora bulutlar

O‘ynashar quvlashmachoq.

Kalla solib bir-birin

Burnini qilar pachoq.

Chetdan boqib ohista,

Nasihat qilar quyosh:

– Bu axir qaltis o‘yin,

Bo‘lmang bunchalar bebosh.

Yig‘lasangiz, yomg‘irga

To‘lib ketar hammayoq.

Dehqonlarni ranjitmang,

Yerni qilib qatqaloq.

G‘aroyib gol

Javlonni ko‘rdingizmi,

Peshonasi do‘ng, g‘urra.

Shundanmi, shishib ketgan

Deysiz naq ko‘m-ko‘k g‘o‘ra.

Sababi, u tushida

O‘ynabdi rosa futbol.

Hatto g‘olib bo‘libdi

Boshi bilan urib gol.

Dutorning jazosi

Chalmoq istab dutorni

Qo‘lga olgandi Jo‘ra,

Ovozlari tiringlar

Soz-chi, gap uqmas sira.

Jahli chiqib Jo‘ravoy

Osiltirib qovog‘in,

Rosa boplab buradi

“Gunohkor”ning qulog‘in.

Zulfira NO‘MONOVA,

TDO‘TAU talabasi