Assalomu alaykum! “Gulxan” jurnali saytiga xush kelibsiz!

Saytimizda bir-biridan qiziqarli maqolalar, hikoyalar, ertaklar va she’rlarni o‘qishingiz mumkin. Turli fanlarga oid ma’lumotlar bilimlaringizni yanada boyitishga yordam beradi!

“Gulxan atrofida” toʻgaragi aʼzolari ijodidan

Toshkent shahar Yashnobod tumanidagi 152-maktabda tashkil qilingan “Gulxan atrofida” nomli yosh qalamkashlar to‘garagi a’zolarining she’riy mashqlarini bir o‘qib ko‘ring-a!

 

Karim uyaldi

O‘ynab-o‘ynab ko‘chada,

Uxlar yarim kechada.

Turolmaydi hech qachon,

Tongda soat ursa bong.

Maktabiga kechikar,

Choyni ham turib ichar.

Qaynab toshar g‘azabi,

Buzilgan-da asabi.

Kitobini qidirar,

Paypoq izlab yugurar.

Dars jadvalin bilmagan,

Uy ishini qilmagan.

Orqaga ilib papka,

Yuguradi maktabga.

Darsga kechikib kirdi,

O‘rtoqlar labin burdi.

Turibdi terlab-pishib,

Soch manglayga yopishib.

Unga termilib ustoz,

Nasihat qildi biroz:

– Bilsayding vaqtning qadrin,

Ko‘zga surtarding gardin.

Ulgurarding har ishga,

Darsga qolmasding kechga.

Turmas eding qizarib,

Ranging o‘chib, bo‘zarib.

Yig‘lab yubordi Karim,

Dedi: – Do‘stlar kechiring,

Vaqtni bilib sarflayman,

Ishonchingiz oqlayman.

 

Mubina TohirboYeva,

6-sinf

 

Onamga

Dunyoda har kishi onaga atab

She’r yozib ko‘radi hech bo‘lmasa bir.

Men onamga ta’rif beraman desam,

Xotiramga kelmas na so‘z, na satr.

Ko‘nglimda borlari tarqoq, aralash,

Shu onda tiqilar bo‘g‘zimga tugun.

Tugundan otilib chiqolsa  ul so‘z

Eng mashhur she’r bo‘lar, albatta, bir kun.

                                   

Farangiz SaydaHmadova,

9-sinf

 

Bahor kutmoqda

Bahor suluv kelinchakday

Ibo bilan boqadi.

Jilg‘alar shod chuldirab,

Erkalanib oqadi.

 

Sho‘x shabada yalpizlarning

Qulog‘idan tortmoqda.

Do‘stlar yuring, unda bizni

Zumrad bahor kutmoqda.

                   

Mohina NurboboYeva,

5-sinf

 

Koʻklam quvonchi

Yashnab ketdi, qirlar, dalalar,

Lola terib yurar bolalar.

Ko‘zlarimda oftob sevinchi,

Dilga tushdi bahor quvonchi.

 

Qish dardida guvillar hamon,

Kengliklarda ayozli shamol.

Biroq unga qilmasdan parvo

Ko‘kda varrak  qiladi parvoz.

                   

Dilnoza Rustamova,

5-sinf

2016–2020 © “Gulxan” jurnali tahririyati. Barcha huquqlar himoyalangan. Saytdan ma’lumot olinganda manba ko‘rsatilishi shart.