Mehnatkashlar tanlovi

Bog‘ga chiqdim hayronman,

Ayni bahor faslida.

Eng ishyoqmas, dangasa

Men ekanman aslida.

Don-dun tashir chumoli,

Ari bol yig‘ar viz-viz.

Binafshaga chiqvolib

Suratga olar qo‘ng‘iz.

Qo‘shiq kuylar la-la-la

Turfa qushlar, bulbullar.

Bog‘da chizar loyiha

Dizayner – quvnoq gullar.

Qaldirg‘ochlar quruvchi,

Uy qurishga bog‘lar bel.

Ko‘tarvolib belkurak,

Chuvalchang qazir tunnel.

Mehnatkashlar tanlovi

Ekan keyin bu bilsam.

Qatnashishga ahd qildim

Musobaqada men ham.

Ishni boshlab do‘stlikdan,

Ukam bilan yarashdim.

Uy vazifa tayyorlab,

Oyimga ham qarashdim.

Yodladim ellikta so‘z,

Tarjimon bo‘lmoqchiman.

Mehnat qilib birinchi

O‘rinni olmoqchiman.

Ezgulik

Ular oppoq bulutlar,

Tiniq musaffo osmon.

Qiqirlab suv oqmoqda

Borliqqa bo‘lay, deb jon.

Kelar ezgulik isi,

Gullar taratar ifor.

Dunyoda shunday yaxshi

Hali qancha narsa bor.

Dunyoda shunday yaxshi,

Hali qancha narsa bor...

Dilnavoz NAJIMOVA,

Toshkent Kimyo texnologiyalari instituti qoshidagi Chirchiq akademik litseyi o‘quvchisi