Bizga hamroh “suhbat, saboq, qayd”ingiz,

O‘qiyapmiz she’r-u doston, baytingiz.

Madhiyasiz tong otarmi, ayting Siz?

Nomingiz o‘chmagay, takrordir yodda –

Sizga haykal qo‘ydik, Qashqadaryoda.

“Jannatga yo‘l”, “Ranjkom” va “Sohibqiron”

Yetti iqlim aro dovrug‘i doston.

“Munojot”ni o‘qib yig‘lar olomon,

Bahr-u bayt jaranglar, har bir davrada,

Sizga haykal qo‘ydik, Qashqadaryoda.

O‘zbek qahramoni, shoir-sardori,

Sizning har baytingiz elning ash’ori,

Yuksak sharaflandi ijod diyori,

Iqboli kulgan yurt, ilmi ziyoda –

Sizga haykal qo‘ydik, Qashqadaryoda.

Aziz boshda do‘ppi, yelkada chopon,

Qo‘lda kitob mangu hamroh begumon,

Qaroqlar quvnaydi ko‘rib, dilda shon.

Izdoshlar nomidan berishib va’da –

Sizga haykal qo‘ydik, Qashqadaryoda.

Yoshligingiz o‘tdi mo‘jaz qishloqda,

Xayol og‘ushida kezib ovloqda.

Ustoz, har satringiz o‘tli, qaynoq-da,

Mumtozlar safida, adabiyotda –

Sizga haykal qo‘ydik, Qashqadaryoda.

Har shoirga bir bog‘ qoldirmoq – tilak,

She’r ishqida yonib, tepmoqda yurak.

Sizga taraf yo‘qdir, yo‘lingiz bo‘lak,

Hayotingiz ibrat bizga dunyoda –

Sizga haykal qo‘ydik, Qashqadaryoda.

E’zoza YO‘LDOSHEVA,

Abdulla Oripov nomidagi

Davlat ixtisoslashtirilgan maktab-internati o‘quvchisi