Assalomu alaykum! “Gulxan” jurnali saytiga xush kelibsiz!

Saytimizda bir-biridan qiziqarli maqolalar, hikoyalar, ertaklar va she’rlarni o‘qishingiz mumkin. Turli fanlarga oid ma’lumotlar bilimlaringizni yanada boyitishga yordam beradi!

Qorbuvi

Tuni bilan rosa qor yogʻdi. Ravshan bobo tongda hovlidagi qorlarni kurab, bir yerga uyub qoʻydi.

– Voy, buncha koʻp qor, – quvonib ketdi Firdavs. – Bobojon, endi Qorbobo yasaymizmi?

– Yasaymiz! – bobo bilan nabira ishga kirishib ketishdi.

– Bobojon, boshiga chelak kiydirib qoʻyamizmi? – soʻradi Firdavs Qorboboning qizil sabzili burni-yu, qop-qora koʻmir koʻzlari bitgach.

– Chelaging kichkina, uni Qorbolaga kiydiramiz. Qorboboga esa mening eski telpagimni beramiz.

– Urre, Qorbola ham yasaymizmi? U oʻrmondan oʻz-oʻzimga archa olib keladi-a?

– Olib keladi, sovgʻa ham olib keladi... – Qorbola tayyor boʻlganda hovliga Muhabbat buvi chiqib qoldi.

– Buvijon, qarang, bobom menga Qorbola yasab berdilar. U mening oʻrtogʻim boʻladi.

– Yaxshi boʻpti. Bobosi, agar sovuq oʻtmagan boʻlsa Malika qizingizga ham Qorqiz yasab bering, hozir maktabdan qaytadi, – dedi Muhabbat buvi yelkasiga xalta osgan Qorbolaga zavq bilan qarab, – xuddi Firdavsga oʻxshabdi.

– Buvijon, men Qorqiz yasay olaman. Oyim qalpoqlarini, boʻyinbogʻlarini berganlar. Bobomga katta roʻmolingiz bilan bir koʻzi singan koʻzoynagingizni bersangiz, sizga ham Qorbuvi yasab beradilar. Keyin Qorbobo, Qorbuvi, Qorqiz va Qorbola birga-birga oʻrmonga borib, hammamizga sovgʻa olib kelishadi, – dedi Firdavs sovuqdan qizargan burnini tortib.

 

M. HAMIDOVA

2016–2017 © “Gulxan” jurnali tahririyati. Barcha huquqlar himoyalangan. Saytdan ma’lumot olinganda manba ko‘rsatilishi shart.