Multfilmlarni yaxshi ko‘radigan aziz bolalar! Tarixiy, milliy ruhdagi multiplikatsion filmlar yo‘nalishida muhim yangilik! Buyuk ajdodimiz, qomusiy olim Abu Rayhon Beruniy haqida animatsion (animatsiya — alohida tasvirlarning yuqori tezlikda ketma-ket ko‘rsatilishi) multfilm ishlanmoqda.  Multfilmning ssenariy muallifi “Gulxan”ning faol ijodkori, qiziqarli fantastik ertak, hikoya va qissalari bilan bolalar ko‘nglini zabt etgan yozuvchi Muazzam Ibrohimovadir. “Beruniy sarguzashtlari” siz va ukalaringizni buyuk allomaning bolaligi bilan yaqindan tanishtiradi, ta’lim olishga va milliy qadriyatlarimizni anglatishga xizmat qiladi. Loyihaning qahramonlari Beruniy va uning do‘stlari. Qisqa metrajli multfilmning 1-qismi 13 daqiqadan iborat. Keyingi qismlar 5-6 daqiqadan iborat. Har bir qism uchun alohida mavzular tanlab olingan. Multfilmning har bir fasli 10 qismni o‘z ichiga oladi. Jumladan, birinchi faslda Abu Rayhon Beruniyning bolaligi tasvirlanadi. Ikkinchi faslda esa uning yoshlik davridagi kichik kashfiyotlari hikoya qilinadi. Voqealar tarixiy ma’lumotlar va badiiy to‘qima asosida ishlangan. Multfilmni ko‘rgan har bir bolada “Beruniy ham men kabi bola bo‘lgan ekan, demak, o‘qish, izlanish va mehnat uni shu darajaga ko‘targan ekan-da” degan fikr paydo bo‘ladi. Multfilm 3D va 2D grafikasi asosida tayyorlangan. Mutaxassislarning fikricha, ani­matsion multfilmlarni tayyorlashning o‘zi­ga xos murakkablik jihatlari bor. Ya’ni, multfilmning 13 daqiqalik birgina qismini tayyorlash uchun 6-8 oy vaqt sarflangan.

Bu hozircha boshlanishi! Ani­matorlar buyuk alloma­larimizning har biri haqida alohida multfilm ishlashni reja qilishgan.