Hash-pash deguncha, yoz­gi ta’til ham o‘tib ketdi. O‘tgan yili ta’til boshida bu­vim, onam, opam va ukam bilan Marg‘ilon shahrida joylashgan Er­kin Vohidov nomidagi ijod maktabiga borgandik. Mak­tab Ijodkorlar bog‘iga ulangan bo‘lib,  uning mar­kazida yurtimizning sevimli farzandi, O‘zbekiston qahramoni shoir Erkin Vohidovning haykali o‘rnatilgan. Nimagadir o‘shanda maktab o‘quvchilariga juda havas qildim va shu maktabda o‘qishni dilimga tugib qaytdim.

Yoz oyida ijod maktabi imtihonlarini topshirdim. Imtihon paytida ustozlar  xush­muomalalik bilan “Xush kelibsiz, bolajonlar! Astoydil harakat qiling. Albatta, imtihondan o‘tasiz, asosiysi, hayajonlanib o‘zingizni yo‘­qotib qo‘ymang. Barchangizga omad!” deb dalda berishdi. Talabgorlar va ularning yaqinlari uchun juda katta imkoniyat va qu­layliklar yaratilgandi. Oxirgi 3-bosqich imtiho­nini topshirib chiqqanimdan keyin har tong o‘zimga o‘zim “Sinovlardan o‘ta oldimmikan?” degan  savol berardim. Ustiga-ustak ustozlarim va do‘stlarim “Natijalar chiqibdimi?” deb so‘rashardi. “Yo‘q, hali chiqmadi, kutyapman”, derdim hayajon bilan.

Va nihoyat, 19-avgust kuni kechki payt telefonimga: “Tabriklaymiz. Erkin Vohidov nomidagi ijod maktabiga qabul qilindingiz!” degan xabar keldi. Bu so‘zlarni o‘qib, ko‘zlarimga ishonmadim. Eng katta orzularimdan biri ushaldi – xursand bo‘lganimni ko‘rganingizda edi! 

Sirdaryolik ustozim Ahmadali Sher­na­za­rovga, jizzaxlik ustozim Ro‘zimurod Bolqiyevga, “Tong yulduzi” gazetasi mu­har­riri Nodira Nazarovaga, Respublika bo­lalar kutubxonasi xodimi, Ijodkor bolalar to‘­garagining rahbari Dilnoza Kamolovnaga, “Yangiyer tongi” gazetasi bosh muharriri Ja­mila Yunusovaga xushxabarni aytib, xur­sandchiligimni ular bilan baham ko‘rdim.

Endi maktabda a’lo baholarga o‘qib, o‘z ustimda ishlashdan to‘xtamayman. Mashqla­rimni yanada boyitib, ko‘proq badiiy asarlar mutolaa qilaman. Biz yoshlarga shunday sharoitlar yaratib berayotgan Prezidentimizdan minnatdorman. Bu imkoniyatlardan foy­da­lanib, nufuzli oliygohlarda tahsil olib, Vatanimizning yanada gullab-yashnashiga o‘z his­samni qo‘shaman, degan umiddaman.

Farzona HOSHIMOVA,

Farg‘ona viloyati Marg‘ilon shahri Erkin Vohidov nomidagi

ijod maktabining 7-sinf o‘quvchisi