Biz  bu yil 8-sinfni   a’lo baholarga tugat­dik. Yaxshi kayfiyatda boshlangan ta’til kunlarimiz   nihoyatda mazmunli  va maroqli o‘tmoqda. Nega desangiz,  kelajakda zarur bo‘lgan hunarlarni o‘zlashtirishga  erishdik. Dadam oyimlar uchun tikuvchilik sexi ochib berganlar. U yerda shifokorlarga  xalat tikiladi. Opa-singil ikkimiz bo‘sh vaqtimizda oyijonimga yordam beramiz. Tayyor bichilgan xalatlarni tikuv mashinasida  tikib chiqamiz. Chevarlikka qo‘limiz binoyiday kelishib qolgan. Tikishga shunchalik o‘rganib ketganmiz-ki,  xalatni  kim tez tikish musobaqasida  ba’zan  oyimdan o‘zib ketamiz. Bunday damlarda, ustozidan o‘zgan  shogirdlarim, deb oyijonimiz  quvonib ketadilar. Shunday bo‘lsa-da, tikkan choklarimizni   diqqat bilan tekshirib oladilar. Aytish esimizdan chiqibdi, chevarlikni bizga oyijonimiz o‘rgatganlar. Qiz bola  qo‘lishirin pazanda bo‘lishi kerak, deb o‘zlari bilgan taom va pishiriqlarni o‘rgatibgina qolmay, internetda tavsiya qilingan taomlarni ham pishirib ko‘rishimiz uchun  kerakli masalliqlarni olib beradilar. Pishirgan  taomlarimizni ta’tib ko‘rish  buvijonimiz zimmasida. Ammo buvimiz birinchi  navbatda tejamkorlikni talab qiladilar. “Isrofgar bo‘lmang, taomning uvoli bor”, deydilar.  Quvonarlisi, taomlarimiz  ta’mi  u kishiga ma’qul bo‘lyapti chog‘i, chiroyli   duo  qiladilar.

Bo‘sh vaqtda badiiy adabiyotlar o‘qish ham sevimli mashg‘ulotimiz. Navoiy nomidagi milliy kutubxonaga a’zomiz. Uyimizda ham kattagina kutubxonamiz bor. O‘qigan kitoblarimizdan ilhomlanib hikoya va maqolalar ham yoza boshladik. Yozuvchi Oybekning “Bolalik”, T.Malikning “Alvido bolalik”, O‘.Hoshimovning “Dunyoning ishlari” kabi asarlari bizda katta taassurot qoldirdi. Kelgusi yil albatta, “Yosh kitobxon” tanlovida  qatnashib,  oliy mukofot – “Spark” avtomashinasini qo‘lga kiritmoqchimiz.

Fotima va Zuhra Ilyosovalar,

Toshkent shahridagi 59-maktab o‘quvchilari