Bolalar uchun eng yaxshi do‘st – ular uchun  nashr qilinadigan  gazeta-jurnallar..Chunki gazeta-jurnal o‘qigan bolaning dunyoqarashi  kengayadi, tafakkuri o‘sadi.  O‘zi uchun ibrat bo‘ladigan qahramonlarni ham kashf qiladi. Afsuski, keyingi  paytlarda  o‘quvchilar  matbuotdan ancha yiroqlashib qoldi.  Bunga sabab – ota-onalarning farzandi tarbiyasiga  beparvoligi. Chunki ular o‘zlari  o‘qib dunyoni tanigan  “Gulxan”, “G‘uncha” jurnallari, “Tong yulduzi” gazetasini eslaridan chiqarib qo‘yishgan  shekilli, farzandini ularga obuna qilishni o‘ylamay ham qo‘yishdi. Yana bilmadim, balki pullarini qizg‘anishar. Lekin unday desam, bolasining tug‘ilgan kuniga jurnalning yillik  obuna  bahosidan  o‘n-o‘n besh  barobar  qimmat turadigan  qo‘ltelefoni sovg‘a qilishadi-ku.

To‘g‘ri, bundan bolakay  xursand bo‘ladi, telefonning ashaddiy  muxlisi bo‘lib qoladi. Undagi  o‘yinlar, ma’lumotlar esa bolaning  nafaqat jismoniy sog‘lig‘iga zarar yetkazayotgani balki ma’naviy olamini ham qashshoq qilib qo‘yayotganiga mutlaqo e’tibor berilmaydi.

Vaholanki, bola gazeta, jurnal o‘qisa,  ma’naviy olami boyiydi, o‘zligini taniydi, qadriyatlarimizga oshno bo‘ladi.

O‘zi ang­lamagan holda  milliy axloq-odob  ruhida tarbiyalanadi.

To‘g‘ri, internet – davr talabi, undan voz kechib bo‘lmaydi. Lekin hamma narsada bo‘lganidek internetparastlikda ham me’yor bo‘lgani yaxshi.

Yoshlarning bir vakili sifatida ota-onalardan iltimos qilardim, bolangizni internet atalmish ko‘rinmas dushman qo‘liga topshirib qo‘ymang. Ularni  kitobga oshno qiling. Badiiy adabiyotga yo‘l esa  bolalar  jurnallaridan boshlanadi.

Ziyodulla Hamidullayev,

Alisher Navoiy nomidagi Toshkent davlat o‘zbek tili va adabiyoti universiteti talabasi