Assalomu alaykum, onajon!

8-mart ayyomi bilan tabriklash bahonasida sizga ayta olmagan dil izhorlarimni ayt­moqchiman, maylimi? To‘g‘ri, boshqalarga o‘xshab sizga har kuni “Sizni yaxshi ko‘raman” demayman, bayramlarda sovg‘a-salomlar bermayman, lekin... sizni juda yaxshi ko‘raman, oyijon!

Gohida siz bilan gap talashib qolamiz. Ba’zan ko‘nglingizni og‘ritib qo‘yganim rost. Keyin sizdan kechirim so‘rasam, siz shunday deysiz: “Onalar hech qachon farzandlaridan xafa bo‘lmaydilar. Seni kechirib bo‘lganman’’. Shunday paytlarda men hayron qolaman. Onalarning bag‘ri shunchalik kengmi?

Kechalari uxlamay ukamni bedor boqib chiqasiz. O‘zingiz uchun umuman vaqt ajrata olmaysiz. Shunda kulib: “Sizlar ukangizdan battar yig‘loqi edingiz”, deysiz. Meni va ikkita akamni ham shunday azob bilan katta qilgansiz-a? Onalar shunchalik bardoshlimi?

Bundan tashqari uy ishlari-chi? Ovqat pishirish, uy supur-sidiri... barcha-barchasiga vaqt topasiz. Shunchalik fidoyimisiz, ona?!

Og‘ir damlarimda menga dalda berasiz. Barcha yutuqlarimda ko‘makchi – siz. Haa... meni “men” qilgan ham siz!

Siz jonimga darmonsiz, ona!

Bu dunyoda onalar ko‘p. Lekin hammaga o‘zining onasi yaxshi. Sabr-toqatli, go‘zal chehrali, mehribon, hamdard, munis, farishtam – onam.

Siz kabi onalarni ta’riflash uchun eng katta shoirlarning tillari ojiz.

O‘tkir Hoshimovning “Dunyoning ishlari”  asarida oltinga teng shunday satrlar bor: “Bola uchun onaning katta-kichigi bo‘lmas ekan. Ona – ONA ekan. Unga boshqa sifat kerakmas!”

 Nega onalar bayrami aynan bahorda?!

Chunki ayollar misoli bahor! Bahorday chiroyli, ko‘rkam, bahorday munis, bahorday nafis.

Demak, bu bayram bilan nafaqat Sizni, oyijon, balki barcha bahor gullariday betakror ayollarni ham tabriklayman. Zero, sizlar hayotimiz mazmunisiz.

Nozimaxon RUSTAMBEKOVA,

 Xorazm viloyati Urganch shahri

30-IDUM 8-sinf