Assalomu alaykum! “Gulxan” jurnali saytiga xush kelibsiz!

Saytimizda bir-biridan qiziqarli maqolalar, hikoyalar, ertaklar va she’rlarni o‘qishingiz mumkin. Turli fanlarga oid ma’lumotlar bilimlaringizni yanada boyitishga yordam beradi!

Oqlangan ishonch

Sizga Muhammadali Rahimov nomi tanishmi? Nahotki, eshitmagan boʻlsangiz! Axir, sportning erkin kurash turi boʻyicha dovrugʻ qozongan oʻquvchi, 9-”B” sinfdan chiqqan chempion-ku!

– Polvonlik Muhammadalining qonida bor. Otasi Saidakbar ham Sariosiyoning dovrugʻli polvoni boʻlgan, – deydi Muhammadalining sinf rahbari Inobat opa Hamroyeva, – Muhammadali barcha fanlardan “aʼlo” va yaxshi baholarga oʻqiydi. Ustozlarga hurmati cheksiz. U bilan faxrlanaman.

Chindan ham ustozlar Muhammadali bilan faxrlansa arziydi. Mana 4 yildirki u sportning erkin kurash turi bilan shugʻullanadi. Dastlab 2-son bolalar va oʻsmirlar sport maktabiga qatnadi, soʻngra Yashnoboddagi 1-BOʻSMda sport sirlarini oʻrganishda davom etdi. Sport ustasi Komil Soliyev unga murabbiylik qildi. Shogirdidagi tirishqoqlik Komil akaning unga boʻlgan ishonchini yanada oshirdi. Koʻp oʻtmay mashgʻulotlar oʻz samarasini koʻrsatdi. 2017-yil Toʻytepa shahrida boʻlib oʻtgan respublika musobaqasida Muhammadali 3-oʻrinni egalladi. Bu uning ilk gʻalabasi edi.

Yosh sportchi 2019-yil erkin kurash boʻyicha Toshkent shahar chempionatining 52 kg vaznli oʻsmirlar oʻrtasidagi bellashuvida 1-darajali diplom bilan taqdirlandi. Muhammadalidagi shijoat, gʻayrat murabbiyni ham ruhlantirdi. Ular keyingi musobaqalarga puxta tayyorlanib, ketma-ket yutuqlarga ega boʻlishdi.

2020-yil erkin kurash turi boʻyicha 2006–2007-yillarda tugʻilgan oʻsmirlar oʻrtasida boʻlib oʻtgan Oʻzbekiston chempionatida 75 kg vazn toifasida Muhammadali Rahimov 1-oʻrinni egalladi. 2021-yilda esa Oʻzbekiston Respublikasining birinchi Prezidenti Islom Karimov tavalludining 83 yilligi munosabati bilan oʻtkazilgan ochiq chempionatda 2006–2008-yillarda tugʻilgan sportchilar oʻrtasida oʻz vazn toifasida gʻolib boʻldi.

Bu hali boshlanishi. Umid qilamizki, oʻzbek sporti dovrugʻini dunyoga taratishga astoydil bel bogʻlagan maktabdoshimiz, Muhammadali Rahimov, hali bundan-da ulkan yutuqlarni qoʻlga kiritadi.

Nigora Turdibekova,

Toshkent shahar Sergeli tumanidagi

300-DIUM oʻqituvchisi

2016–2023 © “Gulxan” jurnali tahririyati. Barcha huquqlar himoyalangan. Saytdan ma’lumot olinganda manba ko‘rsatilishi shart.