Pishiqchilik

Tipratikan g‘arq pishgan

Olmazordan borardi.

Olishga hech iloj yo‘q,

Havas bilan qarardi.

“Tap” etdi-yu naqsh olma

Ignasiga qadaldi.

Ajablanib, bu holga

Tushunolmay lol qoldi.

U yon, bu yon boqib der:

– Hazilmi bu, ne qiliq?

Sado keldi yer-ko‘kdan:

To‘kinlik!

Pishiqchilik!

Xizmating – izzating

Agar sevsang elingni,

E’zozlagin tilingni.

Yurtga qilgan xizmating –

Topgan ikrom-izzating.

Baland tutib aslingni,

Jilovlay bil nafsingni.

Qilib minnat-u tama,

O‘z qadringni toptama.

Nomardlikdan olis bo‘l,

Sofdil, odil, xolis bo‘l.

A’lo xulqli xislating,

Nurga burkar qismating.

Qambar Ota