Taniqli bolalar shoiri Erkin Qambar Namanganda yashab ijod qiladi. U “Gulxan”ning eng faol targ‘ibotchisi, jonkuyar ijodkori. Shoirning “Tegirmonchi”, “Oftobjonning erkasi”, “Yig‘loqi bulut” kabi qator kitoblari allaqachon kitob javoningizdan joy olgan. Yaqindagina”Sharq” nashriyotida chop etilgan “Iqbol-chi, bo‘lmoqchi furbolchi” deb nomlangan ushbu kitobda ijodkorning yangi she’rlari jamlangan. Ular sizga zavq beribgina qolmay, o‘ylashga, fikrlashga o‘rgatadi.

Xo‘rozlar

Bir-biriga

Qilib araz

Urishadi

Ikki xo‘roz.

Yelka bilan

Nuqishadi,

Irg‘ishlashib

Cho‘qishadi.

Tushgan kabi

Ko‘kdan xatlar,

Har tomonga

Uchar patlar.

Jon olishib

Berishar jon.

Ko‘zlar shilpiq,

Og‘izlar qon.

Xo‘rozlarning

Urishini,

Hurpayishib

Turishini,

Olishganda

Sher va G‘iyos,

Men ularga

Qildim qiyos.

Asli ikkov

Edi ahil,

Orasidan

O‘tmasdi qil.

Endilikda

Deb: “san”-u “man”,

Bir-biriga

Bo‘ldi dushman.

Dam yoqadan

Ushlashadi,

Ayamasdan

Mushtlashadi.

Ikkisi ham

Yoqavayron,

Qarab turib

Bo‘ldim hayron.

Vaqt o‘tkazmay

Borib shu kez,

“Urishmang”, deb

Ajratdim tez.

Yarashtirib

Bir-birini,

Bilmoq bo‘ldim

“Jang” sirini.

G‘iyos tajang

Ming‘illab der:

– Yorib qo‘ydi

Sharimni Sher.

Shu payt Sher ham

Tez so‘z qotdi:

– Kechir, desam,

U tosh otdi.

Ayting-chi,

Bir shar uchun

Sinash shartmi

Bilak kuchin?

Urushqoqlik

Yomon odat,

Keltirmaydi

Baxt-saodat.

Hech kim uni

Demas yaxshi.

Do‘st, ahillik

Hayot naqshi.