Assalomu alaykum! “Gulxan” jurnali saytiga xush kelibsiz!

Saytimizda bir-biridan qiziqarli maqolalar, hikoyalar, ertaklar va she’rlarni o‘qishingiz mumkin. Turli fanlarga oid ma’lumotlar bilimlaringizni yanada boyitishga yordam beradi!

Bag‘ri butun, erk tilak bo‘lgin

Bolajon

Rost so‘z bo‘lar ko‘pincha achchiq,

Yolg‘on so‘zning tuzog‘idan chiq,

Haq so‘z uchun mayliga tiz cho‘k,

Hushyor bo‘lgin tilga, bolajon.

 

Ko‘z ilg‘amas g‘ovlar bor qancha,

Tubsiz o‘pqon, zovlar bor qancha,

Tish qayragan yovlar bor qancha,

Hushyor bo‘lgin yo‘lda, bolajon.

 

Yolg‘on so‘z bu – tilning ofati,

Yaxshi so‘zdir dilning rohati,

Haq so‘z erur elning qudrati,

Chin so‘zli bo‘l, elda, bolajon.

 

Botir bo‘lgin, sheryurak bo‘lgin,

Bag‘ri butun, erk tilak bo‘lgin.

Barcha uchun sen kerak bo‘lgin,

Mehr ulash dilga, bolajon.

 

Biz gullarga o‘xshaymiz

Yayrab-yayrab o‘samiz,

Sayrab-sayrab o‘samiz.

Ozod yurtda shod-omon,

Quvnab-quvnab o‘samiz.

 

Ko‘zlarimiz yulduzday,

Yuzlarimiz go‘yo oy.

Kulgimizdan yashnaydi

Keng olam olib chiroy.

 

Biz gullarga o‘xshaymiz,

Baxtga to‘lib yashaymiz.

Hayot bo‘lsin deb go‘zal,

Yo‘llarga gul to‘shaymiz.

 

Quyoshli diyorimiz,

Qiyossiz gulzorimiz.

Tinchlik bo‘lsin dunyoda –

Shu – oliy shiorimiz.

 

Xurram Raimov

2016–2023 © “Gulxan” jurnali tahririyati. Barcha huquqlar himoyalangan. Saytdan ma’lumot olinganda manba ko‘rsatilishi shart.