Qish qahrida qoraygan shahar

Dov-daraxtlar turar yalang‘och.

Xo‘mrayadi sovuq binolar

Charx urmagan hali qaldirg‘och.

Binafshaning mayin patlarin

O‘pgim kelar mushtoq ko‘z bilan.

Yalpizlarning yashil xatlarin

O‘qisam ishq bergan so‘z bilan.

Shamollarning nog‘orasiga

O‘ynamagan lolaqizg‘aldoq.

Dala-dashtda tosh orasiga

Sochilmagan boychechak-bodroq.

Cho‘pon-cho‘liq o‘tovlariga

Mo‘ralamas Oy – xayolparast.

Tog‘ning sirli o‘mrovlarida

Uxlab yotar chashmalar ham mast.

Termulaman qorga bosh qo‘yib

Qishga bandi yotgan bog‘larga.

Xayol degan ozod, hur kiyik

O‘ynab yurar qorli tog‘larda.

Oydin HOJIYEVA