O, yana bahor keldi,

Ko‘ksimda jon gulladi.

Qorlarni pisand qilmay,

Yana bodom gulladi.

Qish qahrini olmay tan,

Bahorni aylab Vatan.

Qo‘shiqlar kuylab sho‘x-shan

Yana bodom gulladi.

Xavotir oldim behad,

Sovuq urib ketsa shart.

Demayin, bu vaqt-bevaqt,

Yana bodom gulladi.

Gullari harir libos,

Paripaykarlarga xos,

Ochilib biram qiyg‘os,

Yana bodom gulladi.

Quyoshga kulib-kulib,

Qishning ko‘ksini tilib,

Qishdan qochib, berkinib,

Yana bodom gulladi.

Bodom u bodom emas,

Bahor ishqi ila mast.

U ko‘nglimdir ishqparast,

Yana bodom gulladi.

Sharifa SALIMOVA