Derazam ortida menga sezdirmay

Sokingina o‘tib ketadi bahor.

Urishib qolgandik ancha yil oldin –

U mening qalbimni etganda abgor.

Javdirab boqqanda ko‘zimga har gal

Kechirgim keladi uni yurakdan.

Qachondir u bergan dardning azobi

O‘tib ketgan edi suyak-suyakdan.

Neki o‘tgan bo‘lsa o‘tdi oradan,

Tozaladim dilda qolgan g‘uborni.

U ham meni juda sog‘ingan kabi

Men ham sog‘inibman, axir, bahorni.

Undan ginam yo‘qdir, arazim yo‘qdir,

Yashil xotiramning sirdoshi hulbo‘y –

Qalbimga sen uning qalbini chorlab

Meni bahor bilan yarashtirib qo‘y.

Halima AHMEDOVA