Mehringizning bulog‘idan

Yuksalmagan millat yo‘q.

Zahmatingiz orqasida

Tama yoki minnat yo‘q.

Bedor o‘tgan tuningizga

Jon ichra jon baxshida.

Mehringizsiz hech bir giyoh

Siyratida hikmat yo‘q.

Bir harf birla qulf ochgaysiz

Dilni bog‘lab dillarga.

Dunyoning ming savobida

Harfingizcha himmat yo‘q.

G‘ubori yo‘q har yurakda,

Yashnatgaysiz katta bog‘.

Ul ma’rifat bog‘i ichra

Shahdingizsiz g‘ayrat yo‘q.

Qanoatdan, itoatdan

Vatan darsiga chorlarsiz.

Shundan o‘zga yurt bog‘iga

Bizda havas, hayrat yo‘q.

So‘z mulkida Navoiydir,

Yassaviydir, Shayx Sa’diy.

Alarki sizga bosh eggay,

Qay satrida hayrat yo‘q.

Qarshingizda ta’zimdamiz,

Oftobjahon ustozlar,

Yer yuzida siz qurgandek

Sohibqiron davlat yo‘q.

Farog‘at XUDOYQULOVA