Kapalak misoli har tomon uchgan,

Cheksiz xayollarim ummoni o‘zing.

Sokin tun bag‘rida yulduzga boqib,

Oyni so‘roqlagan nigohim o‘zing.

Bog‘larda yoqimli sayragan bulbul,

Go‘yo so‘zlar edi qadim ertaklar.

Shamolning kuyida tebranar edi,

Anhorga soyabon qator teraklar.

Bari yodimdadir – bolaligimda

Yalangoyoq o‘ynab yurgan kezlarim.

Hamon ko‘z o‘ngimda chang ko‘chalarda,

Muhrlanib qolib ketgan izlarim.

Bolalik sen birla o‘tgan kunlarim,

Qalbim torlariga ipdek bog‘ladim.

Oppoq orzularga limmo-lim to‘la

Yuragim tubiga mangu joyladim.

Farangiz YO‘LDOSHEVA,

Toshkent davlat transport

universiteti talabasi