Davron bobo kelmagandi,

Koʻpdan beri Toshkentga.

Qoʻsh nabira yetagida

Mehmon boʻldi boshkentga.

Hobil bilan Qobiljonning,

Metro edi ilinji.

Eskalator yerostiga

Olib tushdi birinchi.

Aka-uka hayron qoldi,

Metroda oʻzga olam.

– Bu Navoiy nomli bekat,

Xoʻsh qalay, Hobil bolam?

– Devorlarni kim bezagan? –

Qobil soʻraydi shoshib.

– Rassom Chingiz Axmarovning

Xizmatlari munosib.

– Bu-chi, Oybek nomli bekat,

Qarang qanday koʻrkamdir.

“Bunyodkor”-u “Tinchlik” soʻzin,

Bayroq qilgan oʻlkamdir.

Amir Temur muzeyini

Koʻrgach peshin chogʻida,

Keyin ular dam olishdi

“Gʻafur Gʻulom” bogʻida.

Bu gʻaroyib sayohatdan,

Koʻngillari yashnadi.

“Pop-korn” deb yozilgan soʻz,

Chol koʻnglini gʻashladi...

– Tilimizni qadrlashga

Farosat-ku yetarli.

“Qoʻgʻirmoch” yo “Bodroq” desak,

Asakamiz ketarmi?!

Tursunboy Adashboyev