Vatan

– Senga bitta savol bor,

Menga quloq sol, hoy, qush.

Vayronada yashaysan,

Noming esa naq Boyqush,

Ayt-chi, nahot, sen boysan?

– Asl boylik neligin

Tushunmaysan, chamasi.

Bu vayrona boʻlsa ham,

Oʻzimniki hammasi,

Shuning uchun men boyman!

Yirtqich

Oyisiga ergashib,

Oʻynab kelgan Tulkicha,

Qoʻshni qari Boʻriga

Maqtanib qoldi picha:

– Ayiq katta boʻlarkan,

Hech koʻrmagan ekanman.

Boʻri dedi gerdayib:

– Men ayiqni yeganman!

– Koʻrdim xunuk hayvonni,

Qoʻpol-u, chopar “gʻiz-gʻiz”.

– Xix-xi, tishi uzunmi?

Yeb koʻrganman, u – Toʻngʻiz.

– Uchrab qoldi dalada

Shoxi uzun bir Taka...

– Be-e, u tayyor oʻlja-ku,

Taʼmin totganman, uka.

Traktor degan narsa

Shovqin solib boʻkirib,

Quvladi bizni rosa.

Boʻri dedi:

– Traktor?

Koʻrmaganman hech uni.

Lekin, uka, sogʻ boʻlsak,

Yeb koʻramiz bir kuni.

Anvar Obidjon