Oʻylab koʻrsam, vaqt degan

Rezinali toʻrxalta.

Neki tiqsang ichiga

Sigʻaverar, zoʻr xalta.

Masalan, bir soatda

Nimalar qilish mumkin –

Kitob, gazeta oʻqish,

Samokat minish mumkin.

Doʻsting bilan urishib,

Mumkin hatto yarashish.

Tort yeyayotgan ukangga

“Yordamlashish”, “qarashish”,

Algʻov-dalgʻov qilib soʻng

Mumkin yigʻish uy ichin.

Koʻchirish mumkin hatto

Telefonda uy ishin.

Ha, shularning bariga

Bir soatgina darkor.

Bir kunda bir soatdan

Yana, eh, qanchasi bor!

Harakat zoʻr boʻlsa vaqt

Rezinali toʻrxalta.

Neki tiqsang ichiga

Sigʻaverar, zoʻr xalta!

Hamza Imonberdiyev