Vatanimga

O‘zbekiston, buncha ham

Chiroyga boy go‘shasan?

Kundan-kunga husningga

Yana husn qo‘shasan.

Seni desam, qush kabi

Ko‘kka uchgim keladi.

Buvijonim quchgandek

Mahkam quchgim keladi.

***

Asalariga nasixat

Asalari, asalsan,

Desam, ketding taltayib.

Boplab chaqib, qo‘limni

Qilay deding-ku mayib.

Nasihatga quloq sol,

Yurgil o‘pkangni bosib.

Asal - totli ne’mat-ku,

Bo‘l nomingga munosib.

***

Quyoshning tilagi

Quyosh rosa charchadi

O‘xshab ishchan xolamga.

Uyquga bosh qo‘ygach der:

“Xayrli tun olamga!”

***

Ahd

Tegirmondek shamol  xo‘p

Shopiradi to‘rt yonni.

Tun qo‘ynida o‘rmonda

Hadik bosar Quyonni.

Qari to‘nka ustida

Qaltiraydi, qaqshaydi.

Har bir tovush Bo‘rining

“Uvv”lashiga o‘xshaydi.

Ahd qilar: “So‘yloqning

Joniga o‘t solaman;

Kirpi kabi sertikan

Po‘stin sotib olaman!..”

***

Shilqim shamol va bulut

Osmon toqi gumburlar,

Shamol zoldir o‘ynaydi.

Shilqim shamol bulutni

O‘z holiga qo‘ymaydi.

Bir shapaloq tortishga

Bulut haddi sig‘madi.

Alamini yutolmay

Uvvos solib yig‘ladi.

Yupatay deb Quyoshjon

Bir chekkada jonhalak.

Uning yurak mehrining

Aksi bo‘ldi kamalak.

Erpo‘lat Baxt