Fevral. Ey do‘st!

Keldingmi, qani,

Bir ko‘rishib qo‘yaylik avval.

Oylar ichra

garchi qadding past,

Lekin qadring baland, mukammal.

...Mir Alisher

tavallud kuni,

Ortga tashlab ne sanalarni,

Vatan uzra

boshlab yuborar

Hidoyatli tantanalarni.

O, bobomning

nomi yangragay

Qardosh tillar, yot tillarda ham.

Navolari

navozish etgay

Yaqin ellar, yot ellarda ham.

...O‘n to‘rting ham

yetib kelgaydir,

Shoh va shoir keladi otda, –

Soz-u sozgar

Zahiriddin Bobur

Har g‘azalin kuylar hur Yurtda!

Inja mavqe

maqomlariga

Ne ko‘ngillar ketadi iyib.

Deysan: Dunyo

o‘lmaganniki –

Zoti sharif Boburni suyib.

...Fevral. O‘sgan

bo‘yingga ta’zim, –

ketding barcha oylardan o‘zib.

Minbarlarda

She’r o‘qir, Azim,

Ne shoirlar yuragin yozib!

Azim Suyun