Atirgul

Oʻtgan yili bogʻimizga

Oʻtqizdik koʻp atirgul.

Koʻp oʻtmay ular bizga

Hadya etdi asl gul.

Loʻppi-loʻppi ochilgan

Gullar bahorga husn.

Boʻyi har yon sochilgan,

Bezatgan bogʻning tusin.

Goʻzal Mayni, bahorni,

Qutlashar qushlar butkul.

Sayrab oqshom, saharni,

Oʻtkazar kuychi bulbul.

U shod mehnat aqlidan,

Bizga bogʻ yaratdi, deb.

U shod gullar atridan,

Kuyimiz taratdi, deb.

Bulbul, mayna, qumrilar

Xush ohangda sayrashar.

Erkin, Gulzor, Umrilar

Bogʻdan jilmay yayrashar.

Goʻzal May, bahor chogʻi,

Doʻstlar, toʻplaning boqqa.

Chaman yurtimiz bogʻi,

Gullar anqir dimoqqa.

Kutubxonachi

Kitob – bilimlar koni,

Unda koʻpdir gavhar-dur.

Varaqlab koʻr-chi, qani,

Koʻz oldingda chaqnar nur.

Shu nur yoritar hamon

Bizning ong-fikrimizni.

Har xil ajoyib kitob

Oshirar zehnimizni.

Hamma joyda ochilgan

Koʻrkam kutubxonalar,

Koʻrib zavqlanishadi

Barcha ota-onalar.

Kutubxonalarda ham

Mehribonlarimiz koʻp.

Bizga tanlab berishar,

Qiziq kitoblarni xoʻp.

Ularning mehnatlarin

Keldi maqtash xonasi:

 – Bizga gʻamxoʻr, murabbiy

Har bir kutubxonachi!

Turnalar

Turnalar, hoy turnalar,

Pastlab uchingiz!

Bizning koʻl va daryolar

Bagʻrin quchingiz!

Bizlarni xursand qilib,

Keldingiz shu chogʻ.

Koʻkimizda tizilib,

Soling argʻimchoq!

Erkin-erkin uchingiz,

Osmonni boʻylab.

Qoʻrqmay yerga tushingiz,

Sayrashib-kuylab.

Bizlar koʻl, dengizlarni

Etdik koʻp obod.

Siz ham tushib bizlarni

Qiling juda shod.

Ilyos Muslim