Tiriklikning bol, shiralari,

Biri ulugʻ, kichik birlari,

Faxr etib yurgaydir bari,

Navoiyning nabiralari.

Yarqiraydi tillo uzukdek,

Shu uzukka qoʻyilgan koʻzdek.

Biri Bobur, biri Ulugʻbek –

Navoiyning nabiralari.

Koʻrkam boʻy-u qaddi-qomatlar,

Kulsa shunday kular omadlar.

Chiqmasin hech sizdan nomardlar,

Navoiyning nabiralari.

Oʻz koʻnglida koʻzlar Marslarni,

Gijinglatib yurar «Mers”larni.

Qoldirmasin ekan darslarni,

Navoiyning nabiralari.

Chinniday oq dorilfununlar,

Sizga – yillar, sizga bu kunlar.

Ilm ishqida boʻling Majnunlar

Navoiyning nabiralari.

Qadim zamon, Haq zamonidan,

Oltin chiqqan oltin yonidan.

Siz ham oʻshal oltin konidan,

Navoiyning nabiralari.

Intilsangiz – bir kun yetgaysiz,

Manzillarga ziyo eltgaysiz.

Farhod-Shirin boʻlib ketgaysiz,

Navoiyning nabiralari.

Kurtak yozar payvandlaringiz,

Unutmang hech: dilbandlaringiz,

Tugʻilajak farzandlaringiz –

Navoiyning nabiralari.

Hazrat bobo Soʻzni oʻylagan,

Qancha qosh-u koʻzni oʻylagan.

Asli ul zot sizni oʻylagan,

Navoiyning nabiralari.

El-yurt omon, davron salomat,

Yaratgandan sizga karomat.

Hayot oʻzi aylar xushomad,

Navoiyning nabiralari.

Umr asli – nasib yo nasib,

Har dilga bir gul mutanosib.

Navoiyga boʻlsin munosib

Navoiyning nabiralari.

Sirojiddin Sayyid,

Oʻzbekiston xalq shoiri