Quyosh

Men Quyoshman, Quyoshman,

Hamisha sizdek yoshman.

Zarrin nurlar sochaman,

Hosilga yoʻl ochaman.

Tinch boʻlsin osmonimiz,

Tolmasin posbonimiz.

Meni qutlagay har on

Serquyosh Oʻzbekiston!

Sheʼr degani

Sheʼr degani nur ekan,

Nur ekan, shuur ekan.

Koʻngil degan quloqqa

Bir sirli shivir ekan.

Keling, sheʼrlar oʻqiylik,

Uyqumiz ochilguncha.

Chor atrofga bodroqday

Tuygʻumiz sochilguncha.

Shoir Togʻa sheʼr yozar,

Har dilga esh boʻlsin, deb.

Kimki koʻp sheʼr oʻqisa,

Bahosi “5” boʻlsin, deb.

Yahyo Togʻa