Olmos qalam

Qoldi birdan guldirab

Koʻkda momaguldirak.

Ona tovuq joʻjalarin

Boshlab qochdi, chuldirab.

Yomgʻir yerni iydirar,

Yashil chaqmoq kuydirar,

Eski tandir ostida

Qora kuchuk dildirar.

Yashin – koʻkning ohimi?

Chaqmoq gohi-gohimi?

Chizar olmos qalamda

Nurdan kiyik shoxini.

Kim nimani hush koʻrar

Xohish va taʼb ne oʻzi?

Kim nimani xush koʻrar?

Tulki tovuq izlaydi,

Ayiq bolni tush koʻrar.

Boychechak-chi quyoshni,

Dehqon yerni, dalani,

Beshikdagi jujuqlar

Ona aytgan allani.

Shokir kutib oʻtirmas,

Shirguruchning sovushin.

Xol yoqtirar dars payti

Qoʻngʻiroqning tovushin.

Tursunboy Adashboyev

1983-yil 12-son