Assalomu alaykum! “Gulxan” jurnali saytiga xush kelibsiz!

Saytimizda bir-biridan qiziqarli maqolalar, hikoyalar, ertaklar va she’rlarni o‘qishingiz mumkin. Turli fanlarga oid ma’lumotlar bilimlaringizni yanada boyitishga yordam beradi!

Minora

Buxoroda boʻlganingda –

Koʻrganmisan, Gulnora?

Shaharning qoq oʻrtasida

Turar ulkan minora.

Bulutlarning unga hatto

Tegib oʻtar koʻylagi.

Qancha yurtdan havas bilan

Kelishadi koʻrgani.

Qay tomondan boqma unga

Darrov koʻzga tashlanar.

Qancha ertak, fojialar...

Minoradan boshlanar.

Qariyb ming yil yashamoqda,

Gard qoʻnmagan toshiga,

Qaramoqchi boʻlsang unga –

Doʻpping tushar boshingdan.

Oʻymakorlik naqshlari –

Diqqatingni tortadi.

Oʻtib qolsam yonidan-chi,

Mehrim tagʻin ortadi.

Axir ulkan minorani

Katta bobomlar qurgan.

U kishining hunarlarin –

El maqtagan, el koʻrgan.

Yoʻlim tushsa, unga doim –

Taʼzim qilaman har gal.

U bobomga mangulikka –

Toshdan qoʻyilgan haykal.

Safar Barnoyev

2016–2020 © “Gulxan” jurnali tahririyati. Barcha huquqlar himoyalangan. Saytdan ma’lumot olinganda manba ko‘rsatilishi shart.