O‘zbekiston Yozuvchilar uyushmasi a’zosi Nabijon ERMATOV ko‘p yillardan beri siz – aziz bolalar uchun topishmoq va tez aytishlar, she’rlar yozib keladi. Uning ijod namunalari muntazam ravishda bolalar nashrlarida chop etiladi.

Ijodkor ushbu kitobga tabiatda uchraydigan turfa qushlar haqida o‘rganib, ularni she’rga solib, siz o‘quvchilarga taqdim etibdi. Quyida ulardan namunalar bermoqdamiz. She’rlarni o‘qib, qanotli do‘stlarimizning qiziqarli jihatlari bilan tanishing.

Bo‘ronqush

 Dengiz qushi ham deymiz,

Nay burunli, qop-qora.

Keng ummon osmonida

Charx uradi, bir qara.

Qanoti juda uzun,

Tirsak, suyak baquvvat.

Suv to‘lqini parvozga

Ko‘mak berar kerak payt.

Suvda chaqqon suzadi,

Pardalangan panjasi.

Yengolmaydi uni hech

Suv, to‘fon iskanjasi.

Quruqlikda yilda bir

Birgina bola ochar.

Bo‘rondek kuchli, biroq

Xavf-xatar sezsa, qochar.

 ***

Tovus

Tovuqsimon bir qush u,

Qirg‘ovullar urug‘i.

Oyog‘i xunuk lekin

Go‘zal, uzun quyrug‘i.

Ozuqasi shilliqqurt,

Ham hasharot, chuvalchang.

Ko‘rganni asir etar,

Tutqunlikda bo‘lsa ham.

Kamalakdek tovlanar

Dumin yozsa, bu soz-u...

Shu husniga yarasha

Xush bo‘lsaydi ovozi.

***

Yo‘rg‘a tuvaloq

Tuvaloqsimon zotim,

Vaznim-chi, uch-to‘rt qadoq.

Tovuqlardek qanotim,

Yoqali patimga boq.

Tusim sarg‘ish qum rangi,

Cho‘l rangiga qorishgan.

Yo‘rg‘alayman juda tez,

Oyoqlarim tolishmas.

Afrika, Arabiston,

Osiyo, Qozog‘iston,

O‘zbekning dashtlari ham

Biz uchun bo‘lar makon.

Biz aslida ov qushi,

Uchamiz tez, shitob-la.

Keskin kamayib ketdik,

Kirdik “Qizil kitob”ga.