Yurt tinchi

Sabzi ekdim bog‘imga,

Quyon sanab yesin deb.

Donni ko‘klam chog‘inda

Ekdim, qushlar kelsin deb.

Jonivorlar kezib bog‘

Bizni o‘yga toldirar.

Ayniqsa, qarg‘a “qag‘-qag‘”

Yong‘oq ko‘mib qoldirar.

Qaldirg‘ochlar mehrimni,

Bilib qoldi har yili.

Kim chiqarmas qahrini:

Yurti tinch, ravon yo‘li.

Kitob olib kelsangiz

Kichkintoyman, kichkina,

Menda yo‘qdir kek, gina.

Bizni bilmay ko‘p ona:

“Tarbiyasiz”, der yana.

Tarbiyamiz buzilmas,

Ko‘nglimizni bilsangiz.

“Ma, xo‘rozqand!” demasdan

Kitob olib kelsangiz!..

Kunlar tafti – ajdarboy

Chigirtkajon, chigirtka,

Tayyormisan, zo‘r ishga?

U sakradi uzoqqa,

Men undadim yurishga.

Mening ismim Sanjarboy,

Do‘stlashamiz kel, birga.

Hamla qilsa Ajdarboy,

Yo‘l ochiladi sirga:

U bilan jang qilamiz,

Olovin o‘chiramiz.

Kunlar tafti pasaysa,

Ajdarni kechiramiz.

Rauf SUBHON