Chumolining javobi

Baqa dedi: – chumoli,

Qiyin bo‘ladi holing.

Og‘ir yukni ko‘tarib,

Ne azob, charchab, horib.

– Bu har kungi odatim,

Tark etmayman mehnatim.

Vaqtim-chi, juda ham ziq,

Uyga tashiyman oziq.

Quloq sol o‘rtoq menga,

Bir gapni aytay senga.

Mehnatni sevgin har dam,

Hayotda bo‘lmaysan kam.

Shalola

– Ovozim bordir mayin,

Aylanib qilay o‘yin.

Zerikmayman oqqanda

Suvim tiniq, boq, qanday.

Ketaman yayrab-yayrab,

Go‘yo bulbuldek sayrab.

To‘xtamasdan oqaman,

Men hammaga yoqaman.

Nega oqayin sekin,

Dalada ko‘pdir ekin.

O‘xshab quvnoq bolaga,

Tezroq boray dalaga.

Shildir-shildir oqaman,

Men barchaga yoqaman.

Yunus TOLIPOV