Tahririyatimizga Namangan viloyati Chortoq tumanidagi 44-maktabning ijodiy-ma’rifiy ishlari bo‘yicha targ‘ibotchisi Ergashoy Sharopova bir guruh o‘quvchilarining she’rlarini jo‘natdilar. Ijod namunalarini birma-bir ko‘zdan kechirdik: bolalarga xos samimiy, ravon yozilgan. Vatanni ulug‘lash, tabiatga oshnolik, insoniy xislatlarni qadrlashga da’vat...

Agar bu o‘quvchilarda she’riyatga bo‘lgan tashnalik so‘nmasa, vaqti kelib ular haqiqiy ijodkor bo‘lib yetishadilar, deb umid qilamiz.

Vatan

Vatan desam ko‘z o‘ngimda

Yashnab turar bog‘lari.

Baland-baland qoyali,

Osmono‘par tog‘lari.

Vatan desam ko‘z o‘ngimda

Hilpiraydi bayrog‘i.

Ajdodlar-u avlodlarga

Aziz bo‘lgan tuprog‘i.

Vatan desam ko‘z o‘ngimda

Yam-yashil o‘tloqlari.

Ham bog‘i-yu mevalari,

Silkingan boshoqlari.

Shunday go‘zal Vatanda

Baxtdan shodon yashayman.

Munosib farzand bo‘lib,

Ishonchini oqlayman.

Muazzam ABDUMUTALIYEVA

***

Yulduz uchganda

Munchoq kabi yulduzlar,

Samoni yalt-yalt bezar.

Zavqim ortar termulib,

Go‘yo ertakdan so‘zlar.

Yulduz uchdi bir kuni,

Hayratga soldi meni.

Cheksizlikni yoritar,

Koinotning uchquni.

Eh, yulduzlar, yulduzlar,

Parvozdan neni ko‘zlar?

Yo‘qolmasin o‘rningiz,

Yulduzsiz samo bo‘zlar.

Farhodbek TURG‘UNPO‘LATOV

***

Kamtarlik

Manmanlikni havas qilmam –

Yo‘latmayman o‘zimga.

Kibr-u havo qalbni tilar,

Hushyor bo‘lgum so‘zimga.

Kamtarlik – eng go‘zal xislat,

Bo‘lay ochiq chehrali.

Kamtarlar bor yashnayverar

Ona zamin mehvari.

Elmurod SAYFUDDINOV

***

Anor

Hovlimizning chetiga,

Jajji ko‘chat o‘tqazdik.

Onam aytdilar: “uni,

Sug‘orib tur har kuni”.

Sekin-asta bo‘y cho‘zib,

Daraxtim katta bo‘ldi.

Qaradim mehr bilan,

Kuch-u quvvatga to‘ldi.

Kunlar ketidan oylar,

Undan-da o‘tdi yillar.

Shoxlarida ko‘rindi,

Juda chiroyli gullar.

Kuzga borib daraxtda,

Anorlar rosa pishdi.

Yorilib, donachalar

Go‘yo rahmat aytishdi.

Dilshoda Oybekova