Mehringizning bulogʻidan

Yuksalmagan millat yoʻq.

Zahmatingiz orqasida

Taʼma yoki minnat yoʻq.

Bedor oʻtgan tuningizga

Jon ichra jon baxshida.

Mehringizsiz hech bir giyoh

Siyratida hikmat yoʻq.

Bir harf bir-la qulf ochgaysiz,

Dilni bogʻlab dillarga.

Dunyoning ming savobida

Harfingizcha himmat yoʻq.

Gʻubori yoʻq har yurakda

Yashnatgaysiz katta bogʻ,

Ul maʼrifat bogʻi ichra

Shahdingizsiz gʻayrat yoʻq.

Qanoatdan, itoatdan

Vatan darsiga chorlarsiz,

Shundan oʻzga yurt bogʻiga

Bizda havas, nafrat yoʻq.

Soʻz mulkida Yassaviydur,

Navoiydur, Shayx Saʼdiy,

Alarki sizga bosh ekkay,

Qay satrida hayrat yoʻq?!

Qarshingizda taʼzimdamiz,

Oftobjahon ustozlar,

Yer yuzida siz qurgandek

Sohibqiron davlat yoʻq!

Farogʻat XUDOYQULOVA